距離Bertin 兩歲呢個大日子﹐只有大概個多禮拜咋﹗﹗

想起上年呢個時候﹐自己仲係放緊產假﹐日日全心全意照顧住未夠一歲o既人仔... 轉眼間人仔已經快兩歲啦﹐時間o嚮小朋友身上過得特別快得驚人....﹗

快兩歲既人仔﹐應該點形容呢....

 禮物... ﹗﹗係上天送給我最好o既禮物﹗﹗

應該話係﹐ 他每一個階段﹐由手抱Baby 到而家兩歲人仔對我o黎講都好有意義﹐係無價寶。

到左兩歲呢個時候﹐小朋友就越來越可愛﹗ 動作多多﹐說話多多... ﹗好多o野想表達﹐好多o野想試想學... ﹗﹗每每對身邊每樣事物都好奇﹐充滿無限精力﹑無盡既生命力﹐感染到身邊既人都同樣感到喜悅與希望﹗  步入兩歲﹐開始有自己思想﹑個性﹐小腦袋總有無數念頭﹐無窮創作力﹗

越來越懂得表達愛﹐對心愛玩具o既愛﹐對自己喜歡食物o既愛﹐尤其對父母o既愛... ﹗﹗ 會突然望住你好嗲咁叫“媽媽”﹐一面認真。一雙小眼睛盡是愛意﹐用最直接既表達方法講你知好愛你﹐媽媽一顆心就此融化了...﹗﹗ 朝早醒過來﹐見到媽媽在旁就感到心安﹐之後會望住你由衷地開心笑了.... 一邊摸摸媽媽的臉﹐邊碎碎念眼睛﹑鼻子﹑耳朵﹑嘴巴... 念不停﹐逗得在裝睡既媽媽都忍唔住笑了﹗

總喜歡與媽媽分享自己喜歡的東西... 最愛既“巧虎”卡通﹐聽到某些喜歡o既歌仔就要與媽媽一齊唱一起跳﹔ 喜歡既食物﹐會餵番媽媽食一口﹔ 鐘愛既書本﹐總愛拎到媽媽面前一起看。 無論看多少遍毛毛虫變蝴蝶總會喜悅﹐讀幾多次A...P...W 都依然不厭﹔媽媽望住佢一本正經的小臉﹐同樣地多少次都充滿喜悅都唔會厭﹗

開始有家呢個concept﹐離遠見到家門會好開心咁大叫“屋企”﹗﹗ 想參與家裡事務﹐分擔家務。 媽媽在晾衫﹑掃地﹑洗菜...﹐都想幫忙。 雖然未能幫得上忙﹐甚至越幫越忙﹐但媽媽見你開始有呢個分擔責任o既心﹐都十分安慰。

受驚的時候總會喊“媽媽”﹐躲到媽媽身後就會感到安全。 但人成長始終要靠自己.... 學習面對困難﹐總不能一直做Mammy boy 裙腳仔呀。媽媽唯有忍耐住讓他試試自己應付﹐學習獨立就係成長既代價...  只係﹐任何情況下只要有需要﹐媽媽一定在Bertin 身邊。

乖仔﹐媽媽o既Baby Bertin 要長大了﹗

雖然暗地裡不捨得你長大得咁快﹐但眼見你一天一天進步﹐一日比一日強壯﹐媽媽由心裡面高興﹗﹗ 只要你健康快樂地成長﹐就係送給媽媽最好的禮物﹗﹗