九月五號 Bertin 兩歲生日﹐當然要隆重其事啦﹗因為Bertin 爸三號就要 business trip 番香港﹑大陸﹐會miss 左人仔生日﹐所以Bertin 今年生日就一分為二﹐有上﹑下集啦﹗
上星期日﹐我地就o黎個上集先~﹗﹗ 
經過媽媽精心安排﹐一早已經計劃定點同Bertin 預祝生日。 我早就議定左兩個方案。方案一﹐同人仔去卑斯省最大游樂場 PNE﹐適逢今年踏入第一百週年﹐有得玩有show 睇﹐應該會好fun﹗方案二﹐就係帶Bertin 去位於Stanley Park 內一個大型水族館 Vancouver Aquarium 參觀﹐有好多海洋生物睇﹐又有教育意義﹐Bertin 會喜歡﹗
同爸爸商量過後﹐我地最後決定go for 方案二﹐睇魚魚去﹗﹗
星期日一早待人仔九點半起身﹐食左個簡單既早餐後﹐我地就開始整裝待發啦﹗
呢日天氣唔錯﹐唔太熱又唔涼﹐幾舒服 
。可能因為咁﹐我地到達時雖然只係大概十一點鐘﹐已經出現人龍﹗趕緊排隊俾錢入場﹐小童三歲以下免費﹐大人Admission $28 ﹐都算reasonable。服務處免費提供stroller ﹐小朋友如果行到累累地﹐只需要出示個人ID 就可以租借﹐幾體貼。
坐o嚮stroller上既Bertin表現得好興奮﹐經過魚池邊嘩嘩 叫﹐大叫“魚魚”﹗ 隨便參觀一輪後﹐我地按schedule先去觀影院內既4D show ﹗每人獲影院派發立體眼鏡一對﹐Bertin覺得好得意﹐把玩一番﹗自己又有獨立座位坐﹐顯得好興奮﹐坐坐下仲企起身唱歌仔添 (唔通佢以為我地又去左K房﹗﹖) 片頭一播﹐Bertin已經成個身靠實我﹐一味話啪心口仔話驚驚﹐話要走﹗到影片開始播放﹐big screen big sound ﹐仲有好多效果例如噴水﹑吹風﹑凳搖動…等﹐全部都係小朋友恐懼既元素﹐Bertin就當然嚇到爬過黎我度要我抱實啦﹗不過﹐Bertin都算叻叻啦﹐雖然做樹熊﹐但起碼肯留到最後無喊﹐我見不斷有小朋友喊爆要由後門離開呢﹗ 全片雖然只係大概15分鐘﹐我同爸爸都覺得好精彩﹑好真實﹐好幾個位都俾佢surprise 到﹗
驚嚇過後﹐我地帶人仔去outdoor睇魚魚抖啖氣﹐過下冷河﹗見到Sea Otta ﹑不同類型﹑大小既魚魚﹐Bertin 都覺得好神奇﹗之後﹐我地去探望今日既主角 Belugas! 呢度住既Belugas媽媽生左隻Belugas BB﹐我地特登黎探佢地架﹗因為大部份人黎到都會去見見Belugas﹐所以都要排長龍﹐好彩Bertin 都無表現唔耐煩﹐只係唔停想四圍行。終於排到我地, Bertin都雙眼閃光咁望住﹐好興奮咁…..叫“Woow.. woow” (滴汗…err…呢隻唔係狗仔黎架﹐亞仔) ﹗從來未見過Belugas 呢種海洋生物﹐今次竟然有機會如此近距離睇﹐感覺好 Amazing﹗﹗
食個靚lunch 之後﹐我地準備就緒去睇海豚 show啦﹗Bertin 見到海豚會玩波波﹐會跳會做動作﹐覺得好得意﹐不停叫“Dophine” ﹗見海豚跳﹐佢又跳﹐結果撞親頭仔﹐慘慘豬﹗﹗海豚真係又乖又可愛﹐難怪大人小朋友都鐘意﹗睇完海豚﹐我地仲探訪唔少海洋生物同熱帶動物昆蟲﹐玩到三點幾人仔睡魔急 call 先興盡而歸﹗
七點多﹐婆婆公公等大伙兒o黎到﹐就正式開餐。大家嘻嘻哈哈﹐有說有笑﹐Bertin 不時俾好多笑料我地﹐氣氛相當唔錯。大概Bertin 可能見個個錫自己既人都嚮度﹐情緒特別高漲﹐到十點都未有睡意。不過為左唔想佢地太夜至休息﹐我地就緊接唱生日歌切蛋糕環節。每每聽到生日歌﹐ Bertin 就會好高興﹐雖然可能未必知道咩係生日歌﹐不過可能感受到首歌快樂既氣氛﹐所以聽到就異常起勁﹗
兩歲生日就這樣平實愉快地渡過﹗雖然我地無為Bertin 準備大派對﹑無華麗既場地﹑無賓客列席﹐但我相信小朋友就開心莫過于有父母﹐疼愛自己既親友在旁﹐其他都不打緊﹗
Once again﹐Happy Birthday my son﹗
