人仔踏入人生o既第二個年頭﹐正正係踏入坊間所講o既Terrible Two 階段啦… ﹗周遭既人不斷警戒我話Terrible Two 點點點﹐唔容易應付。 坦白講﹐我攪得要黎就會黎無得預防﹐根本無得擔心﹐所以無多加理會﹗反而好享受而家同呢個兩歲人仔﹐知 D 唔知D 溝通既樂趣﹗
兩歲 milestone﹐媽媽點都要記錄一下有關人仔既生長報告與小發現。
體重﹕無大增加﹐大概25 磅
身高﹕82 cm
牙仔﹕已經出齊
生活時鐘依舊差唔多﹐九點十點鐘上床訓覺豬﹐零晨五/ 六點飲morning bottle﹐再番訓到八﹑九點不等。下午通常兩點左右訓晏覺﹐訓個半至三個鐘頭不等。臨訓一定要飲奶奶﹐否則未能自己入睡﹐仲依賴奶奶 (有待改善)。 喊驚情況少左﹐只係如果半夜訓左就會要求“奶奶” ﹐唔俾既話亦都唔話發脾氣 (婆婆o既話可能例外﹐會咋嬌)﹐肯自己嘗試番訓。 未能獨立自己訓﹐每當扎醒發現身邊無人﹐就會大喊揾人。有時怕我靜靜行左去﹐會越訓越埋貼住我訓﹐覺得咁至有安全感。
飲食習慣都係差唔多﹐食早午晚三餐正餐﹐期間密密食生果﹑果幹﹑餅仔等零食。有挑食物習慣﹐依然係愛食菜蔬瓜果﹑麵飯﹐麵包比肉類多。不愛的食物﹐會吐出o黎 (有待改善)。起碼三餐奶﹐愛好奶奶既習慣依然無變﹐未能夠戒到奶住 (有待改善)。
Pottery Training 條路困難重重﹐雖然覺得佢知道pee-pee & poo-poo 係應該用廁所﹐唔係瀨落片片度﹐會知醜﹐但對 toilet 好抗拒。我同婆婆軟硬兼施都唔惦…可能時辰未到﹐唔想俾壓力大家﹐唯有等待時機來臨啦… (有待改善) 。
刷牙越來越無耐性﹐敷衍了事。媽媽想出手幫忙﹐就勉強俾你刷一﹑兩下就唔肯…(大退步﹗)。
認知
能夠分得清楚﹐並可以成功講出各人的稱號。
繼ABC 後﹐已經學會1 至 10 (廣東話) 同1至 5 (英文)。
學會shape (英文) ﹐如 Circle, Triangle, Heart, Diamond ….等。
分辨到並能講得出唔同基本顏色﹐如黑﹑白﹑紅﹑藍﹑綠﹑黃…等。
有大與小﹑多與少﹑好高好低﹑長與短﹑遠近等概念。
學會用筆畫畫﹐當然未能控制得到﹐但可以分別並畫出圈圈﹑直線﹑點點既不同﹐已經係一個進步。
詞彙認識得越來越多。自己無心講過一次o既詞彙﹐小人兒原來已經牢牢記住﹐失間無神講番出黎嚇你一跳 (always a surprise ﹗) 所以時刻提醒自己要慎言﹗
有方向感﹐車行經屋企附近會大叫“屋企” ﹐公園附近會大嚷“公園” ﹗ (好彩無遺傳到媽媽既方向白痴o者﹗)
離開o既時候﹐無論識定唔識都會同人講bye-bye 再見 (親善大使﹗)
有排隊 line-up呢個concept ﹐同小朋友玩游戲時會一個排一個﹐無話爭住玩。自己嚮屋企玩公仔亦都會要佢地一隻一隻排隊﹐好攪笑。
知道要“排排坐” 即係一齊坐﹐叫佢排排坐都可以坐定定 (一陣咁多囉) 。
媽媽感想﹕
人仔而家俾我感覺好想學習﹐並且吸收得好快﹐好似塊海綿咁不斷 absorb ﹗好高興佢能夠一教就記得﹐並加以於生活中運用。好似字母同數字咁﹐無論嚮街道上既路牌定嚮電視上見到﹐就會興高采烈地朗讀﹗見佢咁用心學習﹐作為媽媽既就更有心機去教。學習對小朋友黎講如果不能應用於生活上﹐就等於紙上談兵﹐唔會有投入感﹐好難產生興趣。我覺得與其要死記爛背﹐生活學習更有效果。要學習顏色不妨奔跑於青綠既草地上摸摸黃色小花﹐抬頭看看藍色的天白白的雲﹐邊玩邊學﹐予學習於娛樂更有意思﹗
喜好
依然最愛巧虎﹐得閑無事就會要求我播。
最愛英文字母 or 數字﹐無論係積木﹑磁石定係貼紙﹐都玩到樂此不疲﹗
鐘愛唱歌跳舞﹐成日“點唱” (點媽媽唱﹗)。
開始愛上畫畫寫字﹐畫圈圈寫字母咁。 成日“點寫” (點人寫﹗) 。
愛閱讀﹐喜歡拎本書到我面前話呢個係Apple 呀﹐呢個係Butterfly 呀… 不過﹐唔係好有耐性聽人講故事 (可能媽媽講得唔夠動聽﹗﹖)﹐感覺佢愛由書本上學習認知多於聽故事。
近來成日撩人玩“躲貓貓” ﹐學“巧虎” 片段把巧虎公仔收埋﹐然後大聲叫“巧虎﹑巧虎” 咁同我四圍揾番出黎。
玩波波﹐邊踢波波邊話“好遠﹗”
近來喜歡玩一歲時婆婆送既車車﹐會自己推車車 or 要求大人幫忙推車車坐。
人仔多趣事
婆婆公公話﹐去飲茶時﹐人仔意識到拎住個盤既姨姨們會有o野食俾佢食﹐對 姨姨們零舍友善特別有反應﹐所以通常都深受姨姨姐姐們既疼錫。
學大人諗計仔個樣﹐對眼珠仔左右咁碌﹐邊“唔… 唔” 咁聲﹐鬼屎咁古惑﹗
口甜舌滑﹐問親個個姨姨姐姐靚唔靚﹐都話靚﹐深受各位姨姨姐姐歡迎。
點唱時﹐會作弄媽媽。佢要求唱“小蜜蜂” ﹐等你唱到一半時佢就話想聽“Apple” ﹐攪到你接應不暇﹐你問佢係咪整蠱媽媽時就會笑。
他的窩心事
多不勝數﹗會突然行埋你叫你幾聲(好甜地) ﹐然後抱住你個頭親一下 (媽媽立刻融掉…﹗)
陪他玩﹐突然會自己躺嚮地氈上﹐然後話“訓覺” 要求你一齊躺。躺在他身邊﹐便會非常高興並摸摸媽媽面面教你幾聲 (又係好甜地) 。
想親你時候﹐會拎起你個眼鏡﹐然後親親額頭﹗
心血來潮﹐小人兒會邊對住我地叫媽媽﹑公公﹑婆婆…輪流叫多遍後興奮得跳起大笑﹐感覺佢知道自己被愛﹐亦好愛我地。
問佢“你幸福嘛﹖”﹐佢會答你 “幸福﹗﹗” 聽到由佢口中說幸福﹐自己都感到好幸福﹐再辛努都有價值。
