話說﹐Bertin 爸九月頭就番o左香港business trip 成三個禮拜。呢段沒有爸爸o既日子﹐周不時會聽到有以下對白﹕

『媽媽﹗﹗爸爸呢﹖』

『爸爸番左工呀。』

『哦﹐爸爸番工﹗﹗』

雖然Bertin 一直都比較麶媽媽﹐但爸爸對Bertin 黎講同樣不能取代。 呢段日子﹐只見媽媽不見爸爸﹐小小心靈有無數個問號﹐不斷問爸爸那裡去﹗

終於爸爸回來了﹗ 爸爸番到屋企﹐Bertin 剛巧在訓晏覺﹐一覺驚醒見到一個似曾相識既人﹐並非媽媽...慢慢意識到係爸爸...﹗人仔既反應﹐竟然唔係我地想象中既開心興奮﹐而係跑番入房“雷”番落張床。爸爸與我跟佢入房看過究竟﹐人仔斜斜望o下爸爸﹐面無表情﹐就別轉個面... 我見到呢個情況﹐就叫爸爸先離開房間﹐之後我同Bertin 耳語o左幾句﹐話佢知道“爸爸放工回來啦”﹐“爸爸好錫你”﹐“仲送左個由四川買來既panda 公仔俾你”﹐佢望左個公仔一眼就伸手潑開﹐之後我啪啪佢就倒頭便睡。

整個過程﹐我看在眼裡﹐知道有人發爸爸脾氣﹐覺得爸爸唔見左人唔理佢。小小年紀已經會有自己想法﹐表達情緒﹐我覺得人仔不斷長大了。

訓醒晏覺﹐如我所料﹐人仔係記得發生過什麼事。佢一醒就爬番去拎起個panda 公仔同我講“俾爸爸”(我估佢其實想話爸爸俾)﹐然後著我開房門俾佢出去。之後見到爸爸﹐人仔就真正表現開心興奮﹐甜笑對爸爸講“爸爸﹗”並遞上panda 公仔話“俾爸爸﹗” 爸爸當然lum 晒啦﹗

爸爸今次工干既後遺症係﹐就算爸爸已經會歸﹐但Bertin 依然時不時會話“爸爸番工﹗”  莫非影響力真係如此厲害﹗幸好媽媽應該唔需要去工干架o者﹗而得著就係知道爸爸o嚮人仔心目中﹐係好重要o架﹗(爸爸﹐你聽到嘛﹗)

其實隨住人仔越來越懂事﹐小腦袋有自己想法。佢愛爸爸媽媽﹐同時亦愛公公婆婆﹐但看得出來佢好想留嚮自己屋企。 每次番到屋企都會好開心﹐望住我甜甜說“媽媽﹗”﹐然後四圍望好開心咁講“屋企﹗﹗”“開心﹗﹗”。 見小人兒如此懂事﹐亦明白佢既心意﹐媽媽總會心頭一酸...。