北美洲慶祝中秋節﹐相比起亞洲當然氣氛沒那麼濃。雖然華人社區都非常重視呢個節日﹐慶賀中秋節活動四處可見﹐應節月餅亦隨處可買得到﹐但無公眾假期始終感覺差好遠﹗適逢今年中秋節係週末﹐星期六迎月﹐星期日追月﹐不用番工過節真係爽D﹗

回想過去與加拿大過中秋節﹐記憶都好模糊﹐好似大多數係外出食晚飯就算﹐什麼玩燈籠賞月﹐通通都無印象…. ﹗只記得﹐呢邊o既月亮真係比香港見過既大好多亮好多﹐果真如舊人講“外國的月光特別圓” ﹐其原因係呢邊地平線比較高之故。而呢年有Bertin 與我地過中秋節﹐令我對以前遺忘o既傳統玩意提起勁﹐再度賞月食月餅玩花燈﹗

中秋節當日﹐爸爸偷得浮生唔使番工﹐可以陪我同人仔過節。我地無預約酒樓食晚飯﹐唔想辛苦同人逼﹐亦免得勞氣食物水準參次上菜慢服務態度唔好 (往年經驗) 。 結果我地一家三口去左買外賣熟食﹐同埋兩款唔同味道既冰皮月餅番屋企慢慢嘆﹐仲舒服﹗ 呢兩個大冰皮一個榴槤味﹑另一個綠頭蓮蓉味各九大蚊加幣一個﹐加埋價錢同餐飯價錢差唔多呢… 不過為左應節豪一次半次啦﹗ 

飯後節目﹐玩花燈去﹗麻麻托爸爸由香港帶黎一花燈俾Bertin 過節﹐係超人公仔造型花燈黎﹐拎埋婆婆上年送既傳統花燈 (都係用電既) ﹐兩個一齊玩﹗ 記得以前自己細細個時代﹐係紙扎用蠟燭點火既舊式燈籠﹐款式通常係楊桃﹑白兔花燈…等。每年中秋到爺爺麻麻屋院玩﹐佢地有舉辦中秋晚會﹐有表演又好多小朋友﹐個時可以點蠟玩火﹐同其他小朋友比較邊個花燈別致﹐好有氣氛﹗而家時代唔同﹐流行用電既燈籠﹐款式多都任何野都有… 但感覺呢﹐始終新不如舊﹐都係傳統花燈比較有代表性。  不過無比較過﹐呢一代既小朋友有電燈籠玩應該已經好滿足﹐好興奮啦﹗ 

我地本打算到天台賞月玩燈籠。誰不知天台燈唔著﹐天黑黑只有月光既光線… 太有氣氛了吧﹗唯有舉家番屋企﹐o嚮自己既balcony 賞月玩燈籠都一樣開心o者。同香港不一樣﹐呢邊既中秋節秋意已濃﹐玩一會我地都唔敢逗留太耐怕會冷傷風﹐中秋節就如此這般安安靜靜渡過啦。  

星期日追月﹐我地與公公婆婆等到附近酒樓食晚飯。本以為大家都大多只會於中秋節慶祝﹐外出食飯﹐原來好多人都會加碼星期日再食﹐酒樓兩輪都全場爆滿﹐好在我地早早預約左六點鐘﹐否則無臺食飯﹗過節當然係美食一臺啦﹐我地呢晚有燒味拼盤﹑家鄉蒸盧魚﹑沙拉肉排﹑魚香茄子煲﹑馬友炒菜心… 等等﹐雖然人多但無影響食物水準﹗可惜我掛住招呼因為睡唔夠心情麻麻既人仔﹐影相欠奉﹗傾傾講講又一晚﹐食埋甜都漏既糖水就完滿啦﹗ 希望大家真正有個人月兩圓既中秋節啦﹗